स्वच्छंद स्वप्नीं

स्वच्छंद स्वप्नीं

फैलावुनी पंख स्वप्नांत जाऊ, स्वच्छंद विहरू, चल तू

दाही दिशांना जिंकीत जाऊ, अनंती भरारू, चल तू ॥

ओवू विजेने निळी मेघमाला,

वाऱ्यासवे झिंगवूया वनाला,

गहिऱ्या धुक्यातून धुंडू स्वतांला,

तारा जिवांच्या जुळवून गाऊ, नवा सूर घुमवू, चल तू ॥

झुलू इंद्रधनुचा झोका करूनी,

ताऱ्यांस चुंबू नभाला भिडूनी,

पंखांत घेऊ क्षितिजे भरूनी,

भूतातली खंत विसरून जाऊ, नवा मोद मिरवू, चल तू ॥

फैलावुनी पंख स्वप्नांत जाऊ, स्वच्छंद विहरू, चल तू

संगे तुझ्या मी, माझ्यासवे तू, ये ना, कुठेही, चल तू ॥