चांदरात
चांदरातीं या तू नि मी मिळुनियां
शुष्क माळावर या ये वसंत फुलवुया
गीत गात गगन झुलवुया ॥
प्रीतबावरी एक आस अंतरीं
चांदण्यांच्याही पार जाऊ विहरू अंबरीं
करमेना भूवरी प्रिया ॥
चिंब निथळत्या रातीं तू धुंद मनाला साथ दे
बावरता प्रीतसागरी तूच जिवाला हात दे
चंद्र साक्ष देतसे
प्रेम लाविते पिसे
खबर उद्याची नसे
तू नि मी कुठे, कसे
चांदरातीं या तू नि मी मिळुनियां
शुष्क माळावर या ये वसंत फुलवुया
गीत गात गगन झुलवुया ॥
मन आनंदें हांसलें, मेघ बनुनि झेपावलें
नवथर नभ धरणीवरी नवरी नटुनी पातले
चंद्रपालखी सजे
तारांगण गजबजे
जग सारे कुजबुजे
गूज गोड हृदयीं जे
चांदरातीं या तू नि मी मिळुनियां
शुष्क माळावर या ये वसंत फुलवुया
गीत गात गगन झुलवुया ॥
कोणत्याही टिप्पण्या नाहीत:
टिप्पणी पोस्ट करा